مجھے یہ جان کر از حد مسرت ہوئی ہے کہ شہید جمہوریت اور دخترمشرق محترمہ بے نظیر بھٹو کی حیات وشخصیت پر پاکستان کے مایہ ناز صحافی جناب مظہر برلاس کی کتاب شہید ِمشرق منظر پر آ رہی ہے ۔تین دہائیوں پر محیط اپنی سیاسی زندگی میں محترمہ نے عوام کے حقوق ،جمہوریت،آئین کی حکمرانی اور مملکت پاکستان کے وقار وخود مختاری کے لیے بیش بہا قربانیاں دیں۔قید وبند سے لے کر جلا وطنی تک کی صعوبتیں برداشت کیں اور بالآخراسی راہ میں اپنی جان کا نذرانہ پیش کر دیا ۔بلاشبہ دنیا کی تاریخ میں کسی ایک شخصیت نے مٹی کی محبت میں اتنا خراج کبھی ادا نہیں کیا۔یوں محترمہ اپنی شہادت میں امر ہو کر پاکستان کی داستان کا ایک درخشاں باب بن چکی ہیں ۔اس باب کو ضبط تحریر میں لا کر آنے والی نسلوں تک باطریق احسن پہنچانا ایک قومی فریضہ اور وقت کا قرض ہے۔

جناب مظہر برلاس عہد حاضر کی صحافت کا نمایاں نام ہیںاور ملکی سیاست کے کئی اہم واقعات کے گواہ بھی۔اس لیے ان کی تصنیف سے یہ توقع رکھی جا سکتی ہے کہ یہ کتاب شعبہء درس و تدریس اور تحقیق سے وابستہ افراداورنئی نسل کے لیے معلومات کا مفید اور مستند ذریعہ ثابت ہو گی۔مجھے امید ہے کہ راہ حق میں دی جانے والی قربانیوں کی یہ داستان پڑھنے والوں کے لیے چشم کشا ثابت ہو گی اور وطن عزیز میں جمہوریت کے استحکام اور فروغ کے لیے انتہائی معاون اور مفید ہوگی۔

ڈاکٹر فہمیدہ مرزا

 سپیکر قومی اسمبلی