اعجاز دا ناولٹ ’’لوہاور‘‘ کمرے وچ کھلری بے ترتیبی توں شروع ہوندا اے۔ ایہہ بے ترتیبی اج دے جیون دی بے ترتیبی وی اے ایس بے ترتیبی نال اج دا انسان کئی روگاں دا روگی ہو چُکیا اے۔جس نال اوس نوں اپنا جیون ہاریا ہویا جیون لگدا اے ایس ناول وچ بندے دی فلاپ محبت ای نہیں شہر دی بے ترتیبی دے رنگ وی نیں۔

اعجاز نے اپنے ایس ناولٹ’’لوہا ور‘‘ وچ کئی shades وِکھائے نیں جیویں بندیاں دی ناکام محبت دی گل کردیاں ہویاں اوہناں نے ہر کردار دے کئی پرچھاویں وِکھائے نیں۔

پنجابی زبان وچ ناول دی رِیت بڑی پکی پِیڈھی بن چُکی اے تے ہُن ایس وچ نویں نویں تجربے وی ہو رہے نیں۔اعجاز ہوراں نے ایس ناولٹ ’’لوہاور‘‘ وچ وی پنجابی زبان دے وکھ وکھ لہجیاں وچ گلاں کردیاں کرداراں نوں بڑی نیجھ نال بیانیا اے۔ایہدے وچ اوس دا بھرواں مطالعہ تے اجوکے ناول اُپر بھرویں نظر آندی اے۔

اعجاز نے روزنامچیاں،رپورٹاں،خبراں،کھوج پتراں نوں ناول دی کہانی دا ای اک حصہ بنا کے ورتیااے،ایہہ تکنیکی لحاظ نال نواں تجربہ اے جو اوس نے بڑی کامیابی نال کیتا اے تے اوس نوں مڈھ توں لے کے اخیر تیکر خوب نبھایا وی اے۔ لاہور وچ اورنج لائن میٹرو ٹرین بن رہی اے ایس نال پورا لاہور متاثر ہویا پیا لگدا اے۔اعجاز ہوراں نے ایس ناولٹ وچ ایس منصوبے دے خلاف نعریاں نوں وی بیانیا اے تے کرداراں نوں سہج سبھا ء نال بیانیا لگدا اے۔

مینوں ایس ناول وچ لاہور دی حیاتی دے کئی پہلو نظر آؤندے نیں پر ایہناں وچ زیادہ پہلو اوہ نیں جس نال لاہوریاں دی حیاتی کسے نہ کسے طرحاں متاثر ہوئی لگدی اے۔

اعجاز ہوراں اپنے ناولٹ وچ اج دی حیاتی نوں درشایا اے۔جتھے سڑکاں بن رہیاں نیں تے انسان بے گھر ہوندے جا رہے نیں۔ایس نوں بیانن لگیاں لکھاری کھُردرے اسلوب توں بچ کے لنگھیا اے۔وکھ وکھ شیواں بیان کردیاں ہوئیاں ہر شے نوں بیانن دے حق نوں ادا کرن دا جتن کیتا اے۔